Ritual Ma'nene

Ritual Ma'nene

Ritual Ma'nene inggih punika ritual tradisional sané kalaksanayang olih suku Toraja ring Tana Toraja. Upakara puniki kalaksanayang ritatkala para kulawarga ngamersihang layon sang sané sampun padem. Layon sané sampun mayusa makudang-kudang warsa sané sampun lintang, kaambil saking setrannyané, salanturnyané pacang kabersihang tur kagentosin panganggennyané. Upakara puniki ngranjing ring upakara adat Rambu Solo' (kapatian).

Dudonan

Upakara punika kakawitin saking para kulawarga lunga ka patané (setra) antuk ngambil layon kulawargannyané sané sampun padem. Patané inggih punika sétra sané mawentuk umah genah antuk layon punika. Sadurung peti layonnyané kaungkabang, Ne'tomina pacang ngwacén mantra mabasa Toraja kuno tur nunas ijin majeng ring para leluhur mangda para kramané ngamolihang karahajengan tur karahayuan nyabran musim nanem tur panén. Ne'tomina inggih punika gelar adat sané kaicénin majeng ring anak sané sampun kadadosang panglingsir, taler maartos imam utawi pendéta. Salanturnyané layon punika kabersihang nganggén kuas sasampun kamedalang saking Patané tur magentos panganggé nganggén kain utawi penganggé sané anyar. Sasampun penganggé punika puput kaanggénang, layon kagenahang malih ring ka Patané. Dudonan acara Ma'nene kapuputang antuk para kulawarga sané mapupul ring umah adat Tongkonan tur ngaturang bhakti sareng sinamian.

Ketahnyané ritual Ma'nene kalaksanayang masinarengan akulawarga ngantos siki désa, nika mawinan upakara puniki kalaksanayang sué. Galah upakara puniki kalaksanayang manut saking galah sané kacumpuang olih kulawarga tur Ne'tomina ritatkala sangkep désa. Tradisi puniki kalaksanayang apisan nyabran tigang ngantos petang warsa. Tetujon saking upakara puniki inggih punika mangda para kramané prasida raket, tur para krama sané meneng ring genah lianan prasida katemu majeng ring reramannyané miwah Nene To'dolo (nenek moyang).