Pura Méru
 | Suratan puniki nénten madué pranala ka suratan Wikipédia liyanan. (Agustus 2022) |
Pura Méru inggih punika pura sané paling ageng ring Pulo Lombok. Pura puniki madué wentuk sané unik makadi Méru matingkat sané raabnyané malakar aji duk. Mawit saking lelintihan, Pura Méru kawangun ring abad ka-18 olih 33 krama désa Pulo Lombok. Pura Méru wantah silih tunggil peninggalan Hindu Jawa Kuno sané magenah ring jalan utama Kota Cakranegara. Genah pura puniki nénten doh saking Pura Taman Mayura.[1]
Pura Méru wantah genah suci krama Hindu sané ketah tur ageng ring Pulo Lombok. Pura puniki kawangun olih Anak Agung Madé Karangasem kirang langkung warsa 1720. Tetujon pura puniki kawangun inggih punika genah sangkep tur hukum krama sané malaksana kaon. Kantos mangkin, Pura Méru dados genah mabakti krama Hindu taler kaanggén dados genah wisata.[2]
Pura Méru kakepah dados 3. Genah pura sané paling suci inggih punika Utama Mandala. Ring jero pura wénten 33 sanggah sané mawarna putih. Sanggah-sanggah punika wantah cihna saking 33 désa sané sareng ngwantu Anak Agung Madé Karangasem ritakala ngwangun Pura Méru. Raab pura mawentuk Méru sané matingkat. Wénten méru sané madué 11 tingkat, tur 2 méru madué 9 tingkat. Méru punika makacihna Déwa-déwa sané wénten ring ajahan agama Hindu, sakadi Brahma, Wisnu, miwah Siwa.
Wénten Sekepat (balé antuk papat saka) sané kaanggén olih Ida Padanda ri tatkala wénten upacara. Taler wénten Saka Ulu (balé antuk kutus saka) sané kaanggén genah banten.
Ring tengah pura wénten Madya Mandala sareng balé kalih tingkat sané kaanggén genah sangkep. Ring jaba pura wénten Nista Mandala sané marupa lapangan tur kaanggén genah sesolahan ri tatkala wénten upacara.
- ↑ "Pura Meru, Pura Terbesar Di Pulau Lombok | Info Lengkap Tempat Wisata di Pulau Lombok Indonésia". id.lombokIndonésia.org (ring Indonesia). 2012-05-23. Kaarsipin saking versi asli tanggal 2022-08-18. Kaaksés 2022-03-24.
- ↑ "Pura Meru Cakranegara - Sistem Registrasi Nasional Cagar Budaya". cagarbudaya.kemdikbud.go.id. Kaarsipin saking versi asli tanggal 2022-06-14. Kaaksés 2022-03-24.