Pis Bolong
Pis bolong inggih punika mata uang sané kantos jaman modern puniki maduwe arti penting ring agama (Hindu Bali) lan upakara manut budaya Bali. Ring jamané dumunan, pis bolong utawi Uang Kepeng wantah kaanggé piranti transaksi olih krama Baliné, sakéwala ring jamané mangkin dados piranti upacara manten.
pis bolong punika taler hasil akulturasi budaya Bali miwah budaya Cina. Pinih riin pis bolong kaanggé piranti transaksi sané sah ring gumi Cina. Selanturnyané kabakta olih para dagang Cina ka Bali.[1]
Pis Bolong ring Idup Krama Bali[uah | uah wit]
Ring jamané mangkin, pis bolong ring Bali kagunayang dados piranti upacara agama. Arti penting pis bolong dados kacingak ring bentuk, bahan, miwah bilangan satuannyané. Pis Bolong puniki stata wénten ring upacara adat Bali, krana kaanggap makta unsur Pancadatu, luir ipun tembaga, timah, besi, perak, miwah emas.
Ring upacara adat Bali, Panca Datu wantah sarana utama - simbul kasaktian sané ngicén urip, kasucian, miwah sida ngaonang unsur-unsur bhuta utawi ala sané ngrabéda guminé puniki. Panca Datu taler kaanggap simbul Panca Dewata, inggih punika lima maniféstasi Ida Sang Hyang Widhi Wasa. [2]
Akulturasi Cina miwah Bali ring Pis Bolong[uah | uah wit]
Kawéntenan pis bolong ring Bali nénten sida kapisahang antuk hubungan dagang Bali-Cina. Sekat jaman Dinasti Han ring Cina (206-220 M), hubungan dagang Bali-Cina nglimbak becik pisan. Hubungan Bali lan China ring penggunaan pis bolong wantah simbul antuk nekekang hubungan krama Cina lan krama Bali sané kaungkap ring critra rakyat Bali. Wénten raja Bali kuna sané mapesengan Jaya Pangus ngrabinin putri Cina "Kang Chi Wie". Pawiwahan puniki akéh katolak olih anak ring puri, sakéwala raja Jaya Pangus kayun pisan ngrabinin putri saking Cina punika. Selanturnyané Putri Kang Chi Wie nunas ka raja Jaya Pangus antuk penggunaan pis bolong ritatkala upacara agama ring krama Baliné mangda stata masidikara etnis Bali lan Cina ring gumi Bali.
Pis bolong puniki sampun malekat ring idup maagama krama Baliné. Akéh pisan pis bolong sané wénten gambar Betara, Pitara, utawi aksara suci.[3]
Pustaka[uah | uah wit]
- ↑ Adi Saputra, I Putu (April 2017). "PIS BOLONG: AKULTURASI CINA DAN BALI DALAM EKSISTENSI SEJARAH LOKAL". Sejarah Lokal : Tantangan dan Masa Depan: 63–67.
- ↑ Putu., Sudarma, I. (2008). Esensi uang kepeng dalam ritual Hindu. Penerbit Pāramita. ISBN 979-722-552-6. OCLC 680425150.
- ↑ Sila, I Nyoman, dkk (Desember 2011). "Uang Kepeng Cina : Media Seni Rupa Tradisional Bali". Jurnal Penelitian dan Pengembangan Sains & Humaniora. Check date values in:
|date=(help)