Pindad

PT Pindad inggihnyane anak utsaha Len Industri sane makeseh ring widang produksi piranti pertahanan. Perusahaan niki madue kalih pabrik, inggihnyane ring Bandung (genah produksi sanjata, kendaraan khusus, miwah mesin industrial) miwah ring Turen (genah produksi munisi miwah lakar peledak komersial). Angge nyokong geginan bisnisne, perusahaan niki taler madue kalih kantor anggan ring Jakarta. Perusahaan niki pinaka silih tunggil perusahaankuna ring Indonesia (manut kalanturang utsaha) sane kantun tetep ngadeg ngantos mangkin miwah pinaka wantah asiki perusahaan manufaktur pertahanan ring Indonesia.

Lelintihan

Perusahaan nilai ngawit lelintihanne ring warsa 1808 rikala Gubernur Jenderal Hindia Belanda, Herman Willem Daendels ngadegan bengkel angge ngawe, miara, miwah mecikang senjata antuk wasta Constructie Winkel (CW) ring Surabaya. Bengkel punika taler dados industri pertahanan kapertama ring Hindia Belanda. Daendels lantur taler ngwangun bengkel munisi maskala ageng antuk wasta Proyektiel Fabriek (PF) miwah laboratorium kimia ring Semarang. Ring warsa 1850, pemerintah Hindia Belanda ngadegan bengkel produksi miwah pamecikan munisi miwah lakar peledak angge Angkatan Laut antuk wasta Pyrotechnische Werkplaats (PW) ring warsa 1850 ring Surabaya. Ring tanggal 1 Januari 1851, wasta CW kauwah dados Artilerie Constructie Winkel (ACW). Ring warsa 1861, PW masikian ka tengah ACW, ngawinan ACW madue tigang unit, inggihnyane unit produksi senjata miwah pirantine, unit produksi munisi miwah lakar peledak, tur unit laboratorium penelitian.