Panganggé Kebaya Jawa
Panganggé Kebaya Jawa pinaka busana adat sané kaloktah ring pulo Jawa. Kebaya punika malengen panjang, taler kentah kanggén rikala upacara adat miwah parikrama formal. Busana kebaya jawa punika ketah mapiranti antuk beludru utawi kain sutera, mawarna selem, pelung, saha barak. Ring tengahné biasané nganggén kamben saha lilitan stagén ring bangkiang. Stagen punika wigunannyane mangda ngwantu mentuk awak sang sané nganggén saha naen jarik utawi kamben batik sané kangg,n mangda nénten makisid mrika-mriki. Sang sané nganggén kebaya jawa ketah sorné kajangkepin antuk nganggé jarik batik panjang sakadi kamben. [1] Rambut sané istri rikala nganggén kebaya jawa punika ketahnyané masanggul. Mangda prasida kacingakin ayu saha mataksu, rikala sané istri-istri masanggul taler kawewehin antuk kondé saha bunga menuh (melati) ba duurné. Sang sané istri-istri rikala mapayas nganggé kebaya jawa taler kawewehin antuk piranti subeng, kalung, bungkung, gelang, miwah sané tiosan. Wénten taler piranti tiosan sané kabakta, inggih punika kipas.
Manut ring panglimbak aab jagaté mangkin, kebaya tradisional Jawa taler nglimbak warna miwah modelné nanging nenten kantos ngicalang pakem asliné inggih punika setata nyaga mangda sopan nekepin aurat. Cecirén sané nglimbak prasida kacingak inggih punika saking warnan kebaya, mangkin sampun manca akéh. Kebaya jawa madué filosofi sané nyinahang kasabaran miwah kaayuan. Potongan kebaya jawa taler setata nganutin wentuk awak sang sané nganggén, punika mateges mangda anak istri saking Jawa setata prasida nyaga raga ring dija ja ipun magenah. [2] Tiosan ring punika, rikala mekebaya sang sané istri-istri kapatutang mangda rikala mamargi nénten krosokan, kaaptiang setata alus banban, duaning punika nyinahang tata titi pinaka sang maraga istri setata ayu alus banban taler ngulangunin sang sané ngatonang.
Cihna (ciri) Kebaya Jawa[uah | uah wit]
Kebaya jawa taler maderbé ceciren minakadi ring sor puniki.
- Kebaya Jawa ketahnyané mapiranti antuk kain brokat, beludru, nilon, miwah sutera sané tipis.
- Kebaya jawa taler nganggén bordiran pita emas ring pahan baong, tangkah, kantos palan kebaya punika.
- Wangun (wentuk) baong kebayané ketah mawentuk V, ring arepne rapet miwah tajep ka sor.
- Wangun (wentuk) lengenné ketah panjang utawi kawastanin wentuk kebaya kartini. [3]
Pustaka[uah | uah wit]
- ↑ Setya, Devi. "Jenis Baju Adat Jawa Tengah, Ada Kebaya dan Beskap". detikedu (ring Indonesia). Kaaksés 2023-03-10.
- ↑ Nandy (2022-10-13). "Pakaian Adat Jawa Tengah: Jenis, Makna, Filosofi, dan Penjelasan". Gramedia Literasi (ring Indonesia). Kaaksés 2023-03-12.
- ↑ "7 Jenis Kebaya Tradisional Indonesia, Asal-usul dan Ciri Khasnya". SINDOnews.com (ring Indonesia). Kaaksés 2023-03-12.