Pandemi koronavirus 2019-2020

Saking Wikipédia

Pandemi koronavirus 2019–2020 utawi pandemi COVID-19 inggih punika peristiwa grubug agung koronavirus 2019. Grubub utawi mrana puniki sangkaning kawéntenan koronavirus marupa soroh sané anyar, kawastanin SARS-CoV-2. COVID-19 pinih kapertama katemonin ring Kota Wuhan, Propinsi Hubei, Cina, ring bulan Désémber 2019. Peristiwa punika kauningin ri kala makudang-kudang jadma irika keni pneumonia, tur nénten kauningin napi sané ngawinang. Grubug puniki kocap krana kawéntenan peken grosir sanganan pasih Huanan sané ngadol sarwa buron sané kantun idup. Sawatara 70% urutan génom SARS-CoV-2 masaih sakadi SARS-CoV.[1]

Ngantos 18 Maret 2020, pinih kidik wénten 198.426 kasus sané sampun kacumpuin utawi kakonfirmasi. Saking makasami kasus punika, wénten 80.894 kasus ring daratan Cina. Akéh jadma sané séda sawatara 7.987 diri. Kasus sané pinih ageng ring Cina, Iran, Itali, miwah Koréa Selatan. Ring sajebag jagaté mangkin, makasami otoritas keséhatan mautsaha mangda mrana puniki nénten nglahlah. Pamerintah Cina nénten nadosang jadma irika medal saking jeroné soang-soang. Wisatawan utawi turis sané malancaran ka Cina, kawarahin mangda nyaga keséhatannyané ngantos sawatara kalih minggu. Sapasira sané ngrasayang keni virus punika, kanikayang mangda nganggén masker pelindung tur ngrereh dokter ring klinik keséhatan. Bandar udara miwah stasiun keréta api nganggén pamriksa suhu raga anggén nguningin para jana sané keni virus korona. Wénten makudang-kudang acara miwah genah malancaran sané katutup mangda mrana korona punika nénten sayan nglimbak. Para kramané taler nénten kadadosang makumpul sareng anak sané lianan, mangda nénten akéh sané keni virus punika.

Wabah punika kabaosang olih Organisasi Kesehatan Dunia (WHO), dados darurat keséhatan krama sané ngresahang jagaté, ring tanggal 30 Januari 2020[2]. Pidarta puniki dados déklarasi kanem sané kalaksanayang olih WHO, saking pandemi flu babi 2009. Wabah COVID-19 ngranayang kawéntenan Xenophobia miwah rasisme majeng ring prati sentana Cina miwah Asia Timur. Kawéntenan pidarta sané patut, ngawinang WHO nganikayang "infodemik" ring tanggal 2 Pébruari 2020.[3]

Pustaka

  1. Cohen, Jon; Normile, Dennis (2020-01-16). "New SARS-like virus in China triggers alarm". Science. 367 (6475): 234–235. doi:10.1126/science.367.6475.234. ISSN 0036-8075.
  2. "Note from the editors: World Health Organization declares novel coronavirus (2019-nCoV) sixth public health emergency of international concern". Eurosurveillance. 25 (5). 2020-02-06. doi:10.2807/1560-7917.es.2020.25.5.200131e. ISSN 1560-7917.
  3. "Note from the editors: World Health Organization declares novel coronavirus (2019-nCoV) sixth public health emergency of international concern". Eurosurveillance. 25 (5). 2020-02-06. doi:10.2807/1560-7917.es.2020.25.5.200131e. ISSN 1560-7917.