Pan Poléng

Pan Poléng
Satua
Aran	Pan Poléng
Tasih kasub maaran	I Gadagan
Data
Gedong Kirtya	4011 / VI b
Negara	Indonésia
Wewidangan	Bali

Satua Pan Poléng inggih punika silih tunggil satua Bali.

Daging carita

“ Ada tuturan satua madan Pan Poléng. Kacerita Pan Poléng ngomong tekéning kurenanné,

"Mén Poléng mani peteng-petengin nyakan, tiang kar luas maurup-urup!"

"Nah!" keto pasautné Mén Poléng.

Kacerita, buin mani galang kanginné, bangun lantas Mén Poléng nyakan. Kacerita, suba semengan suba lantas Mén Poléng nyakan, ngamah lantas Pan Poléng. Suba Pan Poléng ngamah, luas lantas pan Poléng maurup-urup ngaba sokasi. Kacerita ngangin-nganginan pejalanné. Suba jani neked kangin, nepukin anak ngaba cicing berag, ngomong lantas Pan Poléng,

"Kal kija ngaba cicing berag gatine?"

Masaut anaké totonan, "Bakal kutang tiang, tiang tusing demen tekénin cicing berag!"

Buin lantas ngomong Pan Poléng, "Baang jé tiang murupin cicingé ento!"

Masaut anaké ngabé cicingé totonan, "Dé bé murupin cicingé né, meneh idih, baang tiang!" Kéto munyin anaké totonan.

Idiha lantas cicingé ento tekén Pan Poléng, pejangé jumahan sokasiné cicingé to. Suba keto buin lantas nganginan. Nengked kanginan buin nepukin anak ngaba méyong, buin lantas Pan Poléng ngomong,

"Kal kija ngaba méyong?"

Masa­ut lantas anaké ento, "Bakal kutang tiang!"

"Baang jé tiang meli méyongé ento", masaut anaké totonan,

"Dé jé beliné méyong tiangé, ngidih baang tiang!" Idihé lantas méyongé ento tekéning Pan Poléng pejanga jumahan sokasiné.

Buin lantas Pan Poléng nganginan. Nengked bedanginan nepukin anak ngaba bikul, buin lantas ngomong, "Kal kija ngabé ngabé bikul?"

"Bakal kutang tiang", keto pasautné anaké totonan.

"Baang jé tiang meli bikulé totonan". Ngomong lantas anaké ngaba bikulé ento,

"Ah, tiang ten ngadep bikul, yen ragané ngidih, kal bang tiang!" Idihé lantas bikulé ento tekéning Pan Poléng jangé jumahan sokasiné.

Buin lantas Pan Poléng nganginang pejalanné. Nengked bedangina nepukin anak lakar ngematiang lipi, ngomong lantas pan Poléng

"Bakal kenkenang lipiné entt?"

"Bakal matiang tiang’’, keto anaké masaut.

"Dé bé matiangé, tiang bang meli" keto Pan Poléng ngomong.

Mesaut anaké totonan, "Tiang ten ngadepin, kal bang idih tiang" Juang lantas lipiné ento tekéning Pan Poléng, wadahiné sokasi lipiné totonan.

Suba keto, mulih lantas Pan Poléng. Teked di jumahné balihiné isin sokasiné ento tekéning kurenanné. Maré ungkabangé sokasiné, ajinangé misi cicing, méyong, bikul miwah lipi. Mekesiab Mén Poléng ngajinang isin sokasiné, ngomong lantas iya,

"Pan Poléng anggo apé ngaba kene-kene?" masaut lantas Pan Poléng,

"Mendep dogen, ento lakar ubuhin tiang". Ubuhiné lantas cicingé, méyongé, bikulé, miwah lipiné to.

Kacerita suba makelo ubuhiné totonan, mekejang lantas mokoh-mokoh. Lipiné totonan gedé pisan, adé lamun punyan nyuhé gedéné, ngomong lantas lelipiné tekéning Pan Poléng. Kené munyiné,

"Pan Poléng jani atehin kaki mulih, jumah kakiné ditu di bongkol gununge!"

"Nah!" Kéto Pan Poléng masaut. Subé keto atehiné lantas tekéning Pan Poléng.

Gelisin satua, suba nengked di bongkol gunungé. Di bongkol gunungé ento adé goa. Subé nengked ditu ngomong lantas lelipiné tekéning pan Poléng,

"Jani kemu cai mulih, dini umah kakiné. Kaki bangé cai ngidih bungkung abesik."

"Nah", keto pasautné Pan Poléng. Juangé lantas bungkungé ento, bungkung cenik pesan, mulih lantas Pan Poléng.

Teked Pan Poléng jumah, ngomong lantas Mén Poléng tekéning Pan Poléng,

"Teked dijé atuhin lipiné, Pan Poléng?"

"Teked di bongkol gunungé, ditu adé goa gedé gatinan. Né tiang bangé ngidih bungkung besik. Kal anggon bungkungé totonan!" keto Pan Poléng ngomong tekéning kurenané. Kacerita Mén Poléng nganggo bungkung ento, apé ané jemaké tekéning men Poléng mekejang dadi mas. Prajani lantas Pan Poléng sugih.

Kacerita jani, suba makelo yé ngraksa bungkungé ento ketekain bedo lantas yé. Pasuangé bungkungé ento di sig pandené. Jani pandené ngaba bungkungé ento. Indaangé bungkungé ento tekéning pandené. Apé ja jemaké pandené, makejang dadi mas. Apé prajani pandené tonen sugih. Jani yéning tawangé keluihan bungkungé totonan tekéning pandené. Pan Poléngé totonan bangé buungkung len tekéning pandené.

Kacerita jani, bungkung Pan Poléngé siluriné tekéning pandené, anggoné lantas bungkungé ento tekéning Mén Poléng. Mara iya majemakan, nggando nak dadi mas. Mara keto, tawangé bungkungné siluriné tekéning pandené. Ngeling lantas Mén Poléng ajaké Pan Poléng. Subé keto gedég lantas Pan Poléng tekéning Mén Poléng. Dening iya gedég, cicingé, méyongé, miwah bikulé tusing bangé ngamah, kanti berag gati.

Kacerita cicingé, méyongé, miwah bikulé mapitungan lantas iya ajaké tetiga,

"Krana I dewek tusing bangé nasi, ento jenengé ngranayang, bungkungé siluriné tekéning pandené. Ento jenengné krané awaké tusing bangé ngamah."' Kéto pitungan cicingé ajak timpal-timpalné. Suba keto, buin lantas ngomong cicingé tekéning timpal-timpalné,

"Jani was alih bungkung gustin awaké. Bungkungé ento angoné dasar peti tekéning pandené ento." I Meyong di duur petiné ngoyong sambilangé mamunyi,

"Tiang bakal di betén umahé bakal ngoyong." Di sedek bikulé mompong petiné ento, I Méyong mamunyi di duur petiné,

"Apang tusing kadenangé bikul mompong peti tekéning pandené." Kéto pitungan cicingé ajaké timpal-timpalné. Subé mapitungan keto luas lantas iya ajaké tetelu.

Kacerita, suba peteng teked iya di jumah pandené. Pandené suba medem. Mulihan lantas bikulé ajaké timpalné, cicing tekéning I Meyong teked ya jumahan, méyongé di duur petiné lantas ngoyong, cicingé di betén umah ya ngoyong, miwah bikulé mompong petiné ento.

Kacerita bikulé, cicingé miwah I Meyong pejalané ajaké tetelu, dadi bakatangé bungkungé ento. Suba bakatangé bungkungé ento, luas lantas iya. Di pejalanan, iya mulih ngojog tukad yeh gedé pesan. Dening ya tusing ngidaang ngentap tukadé ento, mapitungan ya di sisin tukadé. I cicing masuang tetimbangan,

"Meyong apé buin cai bikul, cai ngidaang ngantab tukadé ento, tuah cai bisé ngelangi, timbang awaké kalahangé tekéning belabaré."

Masaut lantas I Méyong tekéning I bikul, "kéné cicing, awaké terserah cai dogen, kenken ja baan cai, awaké lakar nuutang cai dogen!"

Buin lantas ngomong cicingé ento, "Nah, yen keto, bungkungé lakar dangkal awaké, cai méyong duur awaké ngoyong, cai bikul di duur méyongé ngoyong, kewala enden di tengah tukadé dé pesan cai ngomong!"'

"Nah!" keto pada timpalné masaut.

Kacerita teked di tengah tukadé ngomong lantas I Méyong,

"Cicing anyud aké, cicing!" masaut lantas I cicing,

"ngando-ngando anyud apa!" keto munyin I cicingé.

Lantas ulung bungkungé ento. Teked koné ya di sisin tukadé, buin ya mapitungan, déning bungkungé ulung di tukadé. "kenken bang medaya jani, bungkungé ulung di tengah tukadé. "Cai bé sing bang ngomong, masih cai ngomong. Jani kenken baan medaya, nyilem awaké tusing bisa!" keto I cicingé ngomong. Keweh ajaké tetelu, ngoyong lantas di sisin tukadé.

Kacerita adé gadagan sarapa lantas tekén i méyong. Ngomong lantas I Gadagan tekén I Méyong, "Meyong lakar kenkenang tiang?"

"lakar amah awake!" keto méyongé masaut. Been lantas ngomong I Gadagan,

"méyong dé matiangé tiang, apé ja kesakitanné, tiang bé kar nulungin!" masaut lantas I Méyong,

"Nah, yen keto, awaké ngulungang bungkung di tukadé, kema alih! Yan bakat bungkungé ento, awaké tusing lakar ngematiang cai!" Alihé lantas bungkungé ento tekéning gadagané.

Gelisin satua, bakatangé bungkungé ento tekéning gadaganné, bangé lantas méyongé. Buung lantas amaha gadaganné ento tekéning méyongé. Jani déning suba bakatangé bungkungé ento mulih lantas cicingé bareng ajak timpal-timpalné, I Méyong tekéning I bikul.

Teked jumah bangé Mén Poléng bungkungé ento, jemaké lantas bungkungé ento tekéning Mén Poléng. Tegarangé angoné bungkungé ento, nyemak lantas iya saang, prajani dadi mas saangé ento. Kendel keneh Mén Poléngé déning bakatangé bungkungé ento. Jani cicingé, bikulé miwah méyongé, sayangangé lebihan tekéning nyayangang jelema tekéning Mén Poléng ajaka Pan Poléng. Kacerita Pan Poléng tekéning Mén Poléng negeh- negehang kasugihané, tusing kurangan mas iya. Kéto ketuturan Pan Poléng.

”