Ngurek

Ngurek inggih punika tradisi sane wenten ring Provinsi Bali

Ngurek utawi ngunying inggih punika silih sinunggil tradisi sane wenten ring Provinsi Bali. Ngurek mawit saking kruna "urek" sane maarti ngaryanin song utawi nebek tangkah nganggen keris, tombak utawi sane kasungsung ring genah punika. Tradisi ngurek tradisi sane sakral sane kalaksanayang ritatkala wenten napak pertiwi utawi piodalan ring desa adat sajabag Provinsi Bali. Sane ngemargiang ngurek puniki biasanyane sampun kerauhan utawi ten sadar (trance).

Penglimbakan Ngurek

Pangimbakan ngurek utawi nguying kaanggen minakadi ngemargiang swadarma tur anggen rasa angayubagia ring Ida Sang Hyang Widi Wasa dumogi ngamolihang kerahayuan. Sane ngamargiang ngurek punika sane sampun kapilih olih Ida, tur maning maka cihna Ida sane kaundang sampun rauh. Ngurek dados kapercayaan, kaanggen nedunang Ida Bhatara sareng para reréncang Ida pinaka bukti utawi cihna Ida sampun ngicenin restu ring sarana upakara utawi upacara.

Tahapan Ngurek

Prosesi Ngurek utawi ngunying kabagi dados tigang tahap utawi undagan. Sane kapertama inggih punika Nusdus pinaka ngundang para pelaku ngurek nganggen pasepan sane miik mangda prasida rauh sane kaundang. Tahap sane kaping kalih inggih punika masolah, tahap puniki ngalaksanayang ngigel kairing antuk lagu-lagu, gamelan sane kapimpin kecak. Tahap sane kaping tiga inggih punika Ngaluwur. Ngaluwur utawi ngeluhur ngewaliang sane ngurek kaping raganipun (ngingetang raga).

Cihna Ida ngrangsuk kaping sang sane ngurek inggih punika: minakadi anak ngegedang, mekraikan utawi nengkik kasarengin antuk tabuh gamelan, para pangurek kerauhan, langsung ngurek raganipun biasanyane ring puser, tangkah, jidat, pala, baong, alis utawi penyingakan. Yadiastun bagian punika kaurek, nanging nenten wenten tatu utawi getih.