Laklak
 Jaja Laklak saking pasar désa Mas, Gianyar | |
| Wastan sané tiosan | Serabi |
|---|---|
| Tipé | Jaja |
| Mawit saking | Indonésia |
| Wawengkon utawi wewidangan | Bali |
| Lakaran utama | Tepung, don kayu manis, don pandan, santen, tasik, miwah pamor |
Laklak inggih punika silih tunggil sanganan sané wénten ring Bali sané kakaryanin antuk tepung baas sané mawarna putih wiadin gadang. Bahan sané kaanggén ngaryanin laklak minakadi tepung, don kayu manis, don pandan, santen, tasik, miwah pamor. Tata cara ngaryanin jaja laklak sané kapertama inggih punika tepung, don kayu sugih miwah don pandan kaulet saha kaimbuhin antuk santen, tasik, miwah pamor mangda laklaké prasida empuk. Yéning sampun raket adonannyané raris kakukus ring panyangkaan sané malakar antuk tanah liat saha kapunpunin ring jalikané nyantos rateng. Yéning sampun rateng raris kacacarang antuk don biu miwah kadagingin kelapa sané makikih maibuh gula barak.[1]
Laklak punika lumbrah kaadol ring warung sisin margané. Laklaké punika beciknyané karasayang anget–anget katimpalin kopi wiadin téh. Indik pangargan laklaké wantah siu tali atebih tur kasarengin antuk unti sané malakar aji campuran nyuh makihkih miwah gula bali baduurnyané.
Laklak Biu inggih punika silih tunggil sanganan sané wénten ring wewidangan désa Jatiluwih tur kasub ring kabupatén Tabanan. Laklak biu kakaryanin antuk tradisional nganggè saang ring cangkem paon. Laklak biu malakar antuk biu sané kakaput antuk tepung kasarengin gendis tur nyuh. Taler dados numbas madué rasa sakadi soklat, stroberi, manas, utawi kéju.[2]
Tatacara ngaryanin laklak biu kakawit antuk ngaryanin adonan antuk nyampuhang tepung baas, nyuh, tasik miwah toya. Lantur adonan sané sampun wusan karatengin ring ajeng tungku lantur kadagingin biu ngantos mateng. Sasampun nika wawu kakaput don biu sané kantun gadang.
- ↑ "resep jaje laklak - YOEXPLORE, Liburan Keluarga - Kuliner khas Bali". Majalah YoExplore (ring Indonesia). 2019-06-12. Kaaksés 2020-07-27.
- ↑ Baihaki, Imam. "Laklak Biu Men Bayu, Kuliner Tradisional Khas Penebel yang Selalu Diburu Wisatawan". Kintamani.id. Kaaksés 2024-04-20.