Jam Gadang

Saking Wikipédia
Loncat ke navigasi Loncat ke pencarian
Jam Gadang

Jam Gadang inggih punika wasta antuk menara jam sané magenah ring pusat kota Bukttinggi, Sumatra Barat, Indonésia. Menara jam puniki madué jam sané ageng, nika mawinan jam punika kawastanin Jam Gadang sané ring basa Minangkabau mateges jam sané ageng. Jam Gadang kadadosang pusat penanda utawi ciri khas ring kota Bukittinggi. Jam Gadang taler kadadosang tetujon malancaran olih para kramané. Ring wewidangan Jam Gadang punika wénten taman sané asri, dados kaanggé genah para kramané antuk nglimurang manah.

Wangunan[uah | uah wit]

Jam Gadang mawentuk 6,5 x 6,5 méter, tur jimbar dasar tangga 4 méter, nika mawinan ukuran wangunan punika makasami 6.5 x 10,5 méter. Tegeh menara puniki sawatara 35 méter, sané kapah dados makudang-kudang tingkat. Ring tingkat sané pinih ajeng kadadosang genah antuk nyimpen bandul. Bandul punika usak tur kagentosin krana linuh ring warsa 2007. Wénten patpat jam sané diaméternyané 80 cm. Jam punika kapolihang saking Rotterdam, Belanda, tur kabakta nglintasi pelabuhan Teluk Bayur miwah kagerakkang olih mesin sané kakaryanin kalih manten ring jagaté, inggih punika Jam Gadang miwah Big Ben ring London, Inggris. Jam Gadang kawangun nénten nganggén wesi penyangga tur adukan semén, campurannyané kapur miwah pasir kémanten.

Lelintihan[uah | uah wit]

Jam Gadang puput kawangun ring warsa 1926 pinaka hadiah saking Ratu Belanda antuk Rook Maker, sekretaris utawi controleur Fort de Kock ring masa pamerintahan Hindia Belanda. Arsitéktur wangunan menara jam puniki kakaryanin olih Jazid Radjo Mangkuto. Ngenahang batu pinih pertama kakaryanin olih putra pinih pertama Rook Maker sané ring galah punika mayusa nem warsa. Wangunan Jam Gadang nelasang prabaya sawatara 3.000 Gulden. Saking jam puniki kawangun, kramané sampun seneng ring jam puniki. Nika mawinan jam puniki kadadosang penanda utawi markah tanah miwah titik nol Kota Bukittinggi.

Saking kawangun, wangunan Jam Gadang sampun kauwah tigang kali ring wentuk atapnyané. Ring awal kawangun, atap Jam Gadang mawentuk bunder tur madaging patung ayam jantan. Salanturnyané ring masa pamerintahan Jepang , kauwah dados wentuk pagoda. Tur pinih untat ritatkala Indonésia mahardika atap Jam Gadang kauwah dados wentuk gonjong utawi atap ring umah adat Minangkabau, Rumah Gadang. Uwahan sané pinih ungkur kalaksanayang ritatkala warsa 2010 olih Badan Pelestarian Pusaka Indonésia (BPPI) tur kadukung olih pamerintah kota Bukittinggi miwah Kedutaan Kedutaan Besar Belanda ring Jakarta. Rénovasi punika karesmiang ring ulang warsa kota Bukittinggi sané kaping 262 ring tanggal 22 Désember 2010.[1]

Pustaka[uah | uah wit]

  1. Edinal Agung (24 Februari 2017). Kajian Bentuk Jam Gadang di Bukittinggi (Thesis). Universitas Sumatra Utara.