Gending raré

Gending raré inggih punika gendingan utawi tembang sané ngranjing kesusastraan Bali kakaryanin katur ring alit-alit anggén ngrumrum mangda nenten manying. Gending rare pinaka produk budaya sané kakaryanin olih pangawi nyihnayang kahanan anak alit sarahina ri kala maplalianan utawi ri kala mlajahang raga. Ring Indonésia, gending rare madué nama sané malian-lianan. Sakadi ring Jawa kawastanin Dolanan, yéning ring Bali kawastanin gending rare miwah ngranjing ring sekar rare. Ketahnyane, gending rare madaging piteket sané katur ring alit-alit mangda sida maparilaksana becik sahananing sané kamargiang utawi kalaksanayang ring jagate. sané ngranjing gending rare minakadi Cening Ayu, Dadong Dauh, Meong-meong, Ratu Anom, Dewa Ayu, miwah sané lianan.

Kawéntenan Gending rare kakawitin saking kawéntenan cecimpedan utawi matebag-tebagan sané pinaka plalianan anak alit-alit ring Bali saking nguni. Saking matebag-tebagan miwah bebaosan ring cecimpedan punika nglimbak dados gending rare. Gending rare ketah kaplajahin olih anak alit sané mayusa limang tiban ngantos dasa tiban. Mangkin makeh gending rare sané kasararengin antuk plalianan sané kabaos dolanan.

Ceciren Gending rare

Gending rare madué ceciren sakadi basanyané sadarana riantukan katur ring alit-alit. makeh madaging piteket-piteket mangda alit-alit uning ring sané becik miwah kaon, malianan ring sekar lianan, gending rare puniki nenten kaiket antuk padalingsa utawi uger-uger lianan wantah nganggén syair lagu sané sadarana.