Fahombo
Fahombo utawi lompat batu inggih punika olahraga tradisional saking Suku Nias. Olahraga puniki sadurungnyané dados ritual antuk anak sané sampun kelih ring Pulo Nias, tur kadadosang sasolahan khas saking wewengkon punika. Anak punika patut ngecogin pupulan wangunan batu sané tegehnyané 2 méter tur tebelnyané 40 séntiméter utawi langkung.[1]
Ring budaya Nusantara sadurungnyané, durung wénten latihan fisik sekadi olahraga modéren sané wénten ring galah puniki. Suku asli Nusantara ketahnyané ngubungang aktivitas fisik sareng praktik kasukuan, sakadi ritual, seni, kabugaran fisik miwah béla diri. Sasolahan perang tur perang ritual ring suku Nusantara dados imba saking ritualisasi latihan fisik ring Indonésia modéren. Makudang-kudang ritual suku ring Indonésia masaih sareng olahraga sané wénten sakadi tradisi Fahombo Nias. Ritual pendewasaan puniki masaih sareng lompat gawang tur lompat doh ring atlétik.[2]
Ring galah sané sadurungnyané, truna ring suku Nias pacang ngecogin batu sané tegehnyané langkungan saking 2 méter, tur yéning sampun mresidayang, anak punika pacang dados anak lanang sujati tur dados sareng pinaka prajurit antu perang tur mawiwaha. Saking yusa 10 warsa, anak cerik lanang ring Pulo Nias masayaga antuk nglaksanayang ritual punika. Ritual punika kaprecaya serius ring adat Nias. Anak cerik punika pacang ngecogin batu punika antuk ngamolihang kedewasaan nyané. Anak cerik-cerik punika pacang nganggé panganggo pejuang Nias, sané nyihnayang ragannyané sampun siap antuk perang tur makta tanggung jawab anak lanang sané sampun kelih.
Batu sané kakecogin ring Fahombo mawentuk sakadi monumén piramida tur permukaannyané datar. Tegehnyané nénten kuang saking 2 méter, lébarnyané sawatara 1 méter, tur lantangnyané 60 séntiméter. Sang sané jagi makecog ring tumpukan batu punika nénten makecog manten, nanging patut madué téknik mendarat, krana yéning iwang, jagi ngawinang cedera otot utawi patah tulang. Ring galah sadurungnyané, ring ajeng papan batu punika katutupin olih paku tur bambu runcing, sané nyihnayang kaseriusan ritual puniki ring krama Suku Nias, Tradisi Fahombo puniki dados nglatih para prajurit muda antuk tangkas tur gesit ritatkala ngecogin dinding pertahanan musuhnyané, tur makta obor lan pedang ritatkala wengi.
- ↑ "Beginilah Sejarah dan Tradisi Lompat Batu Pulau Nias" (ring Indonesia). Kaarsipin saking versi asli tanggal 2023-02-06. Kaaksés 2022-12-18.
- ↑ Aldi, Nizar. "Mengenal Fahombo Batu, Tradisi Lompat Batu Asal Pulau Nias". detiksumut (ring Indonesia). Kaaksés 2022-12-18.