Daluman

Daluman wantah silih tunggil sanganan sané marupa ineman. Daluman akéh taler sané maosang Kedaluman. Daluman puniki kakaryanin antuk Don Daluman. Wénten makudang-kudang Don Daluman, wénten Don Daluman Kebo, Don Daluman Cina, Don Daluman Kayu. Don Daluman Kebo puniki rupannyané sakadi don basé, sakéwanten donnyané mabulu. Yéning anggén makarya daluman, katosan mejek, santukan donné katos tur tebel. Kénten taler risampuné mabejek, suéan kentel mangda dados daluman. Don Kedaluman Cina puniki donnyané alitan ring Don Kedaluman Kebo. Don Daluman Cina punika tipis, nénten mabulu, taler gelis pisan mlembung napi malih ring masan sabeh.

Don Kedaluman Kayu puniki donnyané sakadi Don Kedaluman Kebo, donnyané tebel, bunter, sakéwanten nénten mabulu. Don Daluman Kayu puniki witnyané matiosan sareng Don Daluman Kebo miwah Don Daluman Cina. Yéning jagi anggén daluman, Don Daluman kayu puniki taler gelisan dados, yéning bandingang sareng Don Daluman Kebo. Don Daluman Kayu mawit sakadi wit tiosan taler macarang, yéning Don Daluman Kebo miwah Don Daluman Cina witnyané malilit ring wit sané tiosan, nénten macarang kayu.

Daluman katahnyané dados inem-ineman ri kala masan endang utawi panes ngentak. Daluman kadagingin santen kelapa miwah gendis. Wénten taler sané makarya daluman kadagingin bijik utawi bluluk

Pustaka[uah | uah wit]