Cebur nuju daging

Désa Sadé

Saking Wikipédia


Désa Sadé utawi Dusun Sadé inggih punika silih tunggil dusun sané wénten ring Désa Rambitan, Kecamatan Pujut, Kabupatén Lombok Tengah, Nusa Tenggara Barat, Indonésia. Désa Sadé inggih punika silih tunggil genah krama asli Lombok sané kawastanin Wong Sasak. Sawiréh désa puniki kantun nglestariang adat Suku Sasak, Désa Sadé kapanggehang dados Désa Wisata olih Dinas Pariwisata Pulau Lombok. Krama ring Désa Sadé stata nglestariang budaya Sasak sakadi wénten wangunan, adat istiadat, sasolahan, gamelan, pakaian, miwah sané tiosan. Désa Sadé madué luas kirang langkung 5,5 hektar. Wénten 150 wangunan umah tradisional ring désa puniki. Krama ring Désa Sadé kirang langkung wénten 700 jadma. Krama ring désa puniki kantun madué asiki lelintihan sawiréh krama désa kantun nyalanang adat marabian sareng paturu nyama. Adat punika kalaksanayang sawiréh yéning ngambil anak istri saking désa lianan, patut ngamedalang kebo sané kaanggén mahar. Wangunan sané wénten ring désa puniki minakadi umah, masjid, jineng miwah genah sangkep madué arsitektur sané khas Suku Sasak. Arsitektur puniki minakadi dinding sané malakar aji anyaman tiing, saka sané malakar aji kayu, miwah atap sané malakar aji alang-alang. Lantai umah ring désa puniki malakar aji tanah liat sané kacampur sumi. Sabilang aminggu lantai puniki kabersihang antuk tai kebo, yéning sampun tuh laut kasampat tur kagosok antuk batu. Tai kebo punika mawiguna mangda lantai alus tur kuat. Tiosan punika, tai kebo puniki mresidayang ngusir serangga miwah roh jahat sané lakar ngusak-asik kulawarga ring umah punika. Ring Désa Sadé wénten sasolahan minakadi sasolahan gamelan gendang Beleq, sasolahan Cupak Gerantang, miwah sasolahan Presean. Budaya krama Suku Sasak puniki sané ngawinang makéh turis saking manca negara malancaran ka Désa Sadé.[1]

Referensi[uah | uah wit]

  1. "Wisata Désa Sade Lombok Tengah Yang Unik - Wisata Lombok". Lombok Tour Plus - Paket Tour Lombok dan Wisata lombok Favorite #1 (ring Inggris). 2017-08-15. Kaarsipin saking versi asli tanggal 2019-12-28. Kaaksés 2020-04-18.