Bladbadan

Bladbadan kruna lingganipun "babad" artinipun tutur jati sané sampun kalampahan riin. Babad taler maarti abas wiadin basang kebo, banténg, utawi kambing. Sasampun polih seselan "el", pangiring "an" miwah kaduipurwayang dados bebladbadan sané mateges kruna bebasan, kaanggén papiringan, saha madué purwakanti (masajak).

Bladbadan puniki kawangun antuk lengkara utawi kruna tigang palet. Krunané sané pinih riin apalet dados "giing" utawi "bantang", krunané sané kaping kalih apalet, "arti sujati (bebasanipun)", sakadi sampiran, sané ngawangun purwakanti (sajak), krunané sané kaping tiga "arti paribasa", wiadin suksmanipun, makadi:

1. Giing (bantang): majempong bébék,
2. Artos sujati (bebasanipun): jambul,
3. Artos paribasa: ngambul.

Dadosné kecap "mbul" ring kruna "jambul", mapurwakanti ring kecap "mbul" ring kruna "ngambul".

Bladbadan puniki masaih ring "wewangsalan", sakadi papiring indik kahanan kalih laksanan jadma, ring asapunapiné sada pedas suksmanipun. Kewanten yéning anake mabladbadan, artinipun sané sujati nenten kaucapang, antuk kasengguh sami sampun uning ring artinipun.

Conto

Ring sor puniki wénten makudang-kudang conto bebladbadan sake kadérétang manut abjad, luir ipun:

1. "Arjuna durian", suksemanipun tualén, arti paribasané= ngelén-ngelén
2. "Base wayah", suksemanipun kakap, arti paribasané= gapgapan
3. "Beruk magantung", suksemanipun kakocor, arti paribasané= bocol
4. "Belus ilang", suksemanipun ngetuh, arti paribasané= tuh
5. "Damar di langit", suksemanipun bulanan, arti paribasané= bulan
6. "Dasar meka", suksemanipun rasanin, arti paribasané= rasa
7. "Jaja uli magula", suksemanipun abug, arti paribasané= jebug
8. "Jukut gedébong", suksemanipun ares, arti paribasané= ngeres-eresin
9. "Ketimun pait", suksemanipun paya, arti paribasané= semaya
10. "Lawar gerang", suksemanipun manyagerang, arti paribasané= sager
11. "Maabian Jawa", suksemanipun kebon, arti paribasané= ngebon
12. "Mabaju tan palima", suksemanipun kutang, arti paribasané= kutang
13. "Mabatis bébék", suksemanipun gempel, arti paribasané= ngempelin
14. "Mablakas peleng", suksemanipun timpas, arti paribasané= mimpas
15. "Maboreh tangkah", suksemanipun buat, arti paribasané= kuat
16. "Mabuah jaka", suksemanipun beluluk, arti paribasané= nguluk-nguluk
17. "Mabuah kelor", suksemanipun klentang, arti paribasané= klentangin
18. "Mabuah wayah", suksemanipun jebug, arti paribasané= gedébug
19. "Mabuaya di tegal", suksemanipun alu, arti paribasané= nglalu, kalu
20. "Mabubuh kladi", suksemanipun kulek, arti paribasané= elek
21. "Mabunga layu", suksemanipun mayang, arti paribasané= sayang
22. "Macarang uga", suksemanipun sambilan, arti paribasané= masambilan
23. "Maceleng lua", suksemanipun bangkung, arti paribasané= bengkung
24. "Magambar gumi", suksemanipun peta, arti paribasané= peta-peta dogén
25. "Majuan pancing", suksemanipun pales, arti paribasané= males
26. "Makamben di sunduk", (utawi makamen disunduk) suksemanipun ngengsel, arti paribasané= maselselan
27. "Makulkul selam", suksemanipun bedug, arti paribasané= ngadug-adug
28. "Makunyit di alas", suksemanipun temu, arti paribasané= katemu
29. "Masarin tanah", suksemanipun buk, arti paribasané= ibuk
30. "Matabeng gelang", suksemanipun tutub, arti paribasané= tutugang
31. "Mataluh nyuh", suksemanipun tombong, ati paribasané= sombong
32. "Matiuk Jawa", suksemanipun belati, arti paribasané= ngulati
33. "Matulang nyuh", suksemanipun kau, arti paribasané= tau
34. "Nasi matahan", suksemanipun lekin, arti paribasané= delek
35. "Nyapian selam", suksemanipun crewet, arti paribasané= cerai
36. "Pangaput campurit", suksemanipun ngandelang, arti paribasané= kandel
37. "Pepes menang", suksemanipun buruh, arti paribasané= siap buruh
38. "Sakit gidat, suksemanipun ulangun, arti paribasané= langu
39. "Sok gedénan, suksemanipun ngodag-odag, arti paribasané= bodag
40. "Wayang gadang", suksemanipun Kresna, arti paribasané= tresna