Bale-balean
Balé-baléan inggih punika silih tunggil paplalian sané wenten ring wawidangan lombok. Paplalianan puniki witnyané saking kampung Gubuk Daya, Désa Denggen, Kecamatan Selong, Kabupaten Lombok Timur.
Balé-baléan mawit saking kruna balé sané maduwé artos umah, kasama linggayang manados balé-baléan sané naler artosnyané umah-umahan. Paplaian puniki ring genah sané tiosan ketah kasengguh antuk paplalianan antén-anténan santukan paplalian puniki ring saparmagin tata cara miwah tata busananyané nganutin sakadi upacara antén, inggih punika antuk mayasang balé-baléan puniki nganutin ring papayasan panganténan sané taler pinaka unteng patitis ring paplalianan puniki.
Paplalian puniki kamargiang ring galahé nuju nyabran siang utawi soré sawusan krama désane nglaksanayang parikrama manyi ring sawah. Kawéntenan paplalianan puniki nénten wénten pakilitané ring upacara agama utawi adat santukan paplalian puniki wantah pinaka panglila cita utawi balih-balihan sané katur ring krama désa sané wusan manyi taler pinaka panyita rasa leleh ring kramané inucap.
Paplalianan puniki prasida kamargiang sinarengan olih krama désa pamekasnyané alit-alité sané mawit saking purian utawi krama désa sané saking dura puri, yadiastun kawentenan kasta punika maduwé genah sané pinih utama ring kawéntenan acara manusa yadnya pawiwahan utawi antén ring nguni.
Paplalianan puniki nganutin ring sahananin kawentenan parikrama pawiwahan utawi pangantenan ring krama suku sasak ring lombok. Unteng paplalianan puniki inggih punika ngitunutin acara ring pawiwahan mawit saking acara "midang" kantos arak-arakan sang sane nglaksanayang acara pawiwahan, lan kasineb antuk acara palila cita ring wenginyané.[1]
- ↑ (Indonesia), Proyek Inventarisasi dan Dokumentasi Kebudayaan Daerah (1980/1981 [i.e. 1981]). Permainan rakyat daerah Nusa Tenggara Barat. Departemen Pendidikan dan Kebudayaan, Pusat Penelitian Sejarah dan Budaya, Proyek Inventarisasi dan Dokumentasi Kebudayaan Daerah. OCLC 24872272. Check date values in:
|date=(help)