Wayan Windia
Prof. Dr. I Wayan Windia, MS (embas ring Sukawati, Gianyar, 15 Désémber 1949 – seda ring RSUD Sanglah, Denpasar, 1 April 2023 ring yusa 73) inggih punika Kepala Pusat Penelitian Subak ring Universitas Udayana lan dosen ring Program Studi Agribisnis, Fakultas Pertanian, Univérsitas Udayana. Dane muputang kuliah doktor ring Univérsitas Gadjah Mada, Yogyakarta, warsa 2002. Disertasinyane mamurda "Transformasi Sistem Irigasi Subak Berdasarkan Konsep Tri Hita Karana" dadosang dane pinaka ahli nasional ring sajeroning pamargi ngusulang subak pinaka warisan budaya jagat, sane pamuputnyane kaakui olih UNESCO duk warsa 2012. Dane okan I Madé Sanggra, pangawi sastra Bali modern.[1]
Tetilikannyane salami limang warsa puniki tetep ngutamayang indik subak, sane kadana olih skema MP3ES lan HIKOM Kementerian Penelitian, Teknologi, lan Pendidikan Tinggi. Panyelehannyane indik subak mapaiketan sareng panglimbak parikrama subak ring sektor ekonomi, taler dane sampun makarya dokumentasi buku indik pengelolaan sistem irigasi subak ring Bali. Sane mangkin dane dados anggota kelompok ahli Pemerintah Kabupaten Gianyar miwah Penyuluh Kelompok Ahli Kota Pusaka Kabupaten Gianyar. Dane sampun nyarengin tur dados narasumber ring makudang-kudang pabligbagan indik subak sane kalaksanayang olih SEAMEO, SPAFA miwah ICRROM (Pusat Internasional untuk Studi Pelestarian dan Restorasi Properti Budaya).[2]
- ↑ Dibia, I Wayan (2013). Sekar Jagat Bali; Kumpulan Rekam Jejak Tokoh Seniman & Budayawan Bali. Denpasar: Institut Seni Indonesia Denpasar. pp. 355–362. ISBN 978-602-9164-09-1.
- ↑ "Guru Besar Pertanian Unud Prof. Windia Berpulang". BALIPOST.com (ring Indonesia). 2023-04-01. Kaaksés 2025-08-11.