Umah Nuwo Sesat

Umah Nuwo Sesat inggih punika silih tunggil umah adat sane wenten ring Provinsi Lampung. Umah Nuwo Sesat puniki taler kabaos Balai Agung. Ring Lampung, 'Nuwou' maartos umah utawi genah meneng, miwah 'Sesat' maartos wangunan musyawarah utawi parum. Yening jagi ngranjing ka tengah umah puniki patut ngliwatin Jambat Agung utawi Lorong Agung. Jambat Agung utawi Lorong Agung puniki wastan undagan jagi ka umah Nuwo Sesat. Umah punika mapinda panggung sana kakaryanin antuk kayu. Caciren Umah Nuwo Sesat inggih punika wenten lambang Gruda sane pinaka pralambang trah Lampung. Ring duur Lorong Agung wenten 3 soroh pajeng. Sane mawarna putih nyihnayang trah, kuning nyihnayag kampung, miwah barak nyihnayang suku.

Dumun, Umah Nuwo Sesat puniki nganggen ambengan sane maulat, sakewanten duaning panglibak jaman raab saking ambengan punika ical, kagentosin antuk genteng. Panglimbak umah sane wenten ring Lampung akeh keni pengaruh panglimbak jaman. Utamannyane duaning wenten pengaruh saking krama Jawa sane rauh ka Lampung. Mangkin Umah Nuwo Sesat nenten malih kanggen genah paparuman utawi sampun kanggen genah meneng sarahina-rahina. Taler mangkin, Umah Nuwo Sesat sampun akeh sane kagentosin antuk umah sane lebih modern. Sakewanten ring Lampung pamekasnyane ring Kampung Wana, Olokgading, Balambangan Pager, Menggala, Talang Padang, miwah kampung-kampung tua tiosan kantun wenten Umah Nuwo Sesat sane kelestariang.

Pah-pahan Umah Nuwo Sesat

1. Anjungan inggih punika genah sane kanggen genah ngamargiang paparuman alit.
2. Pusiban inggih punika genah sane kanggen ngamargiang paparuman resmi.
3. Ruang Tetabuhan inggih punika genah kanggen ngenahang alat musik tradisional.
4. Ruang Gajah Merem inggih punika genah sane kanggen masandekan olih para penyimbang utawi para anak lanang sane pinih duur.
5. Ijan Geladak inggih punika undagan ngranjing ke tengah umah sane madaging raab. Raab umah adat puniki kabaos Rurung Agung.

Pustaka