Turuk Laggai Mentawai

Tari Turuk Langgai inggih punika tarian tradisional ring Mentawai. Tarian puniki wénten saking sawatara abad kapitulas. Krama irika pracaya unduk tarian puniki pinaka piranti mababaosan sareng roh leluhur. Ketahnyané parilaksana buron punika kacingakin ri tatkala dané maburon miwah ngaryanin tinungglu utawi ladang. Sasampun nyingakin punika, nika ngawinang kaanggén ka wentuk tarian (turuk) ring makudang wentuk gerak utawi uliat sané kasolahang dados pabalihan ring makudang pésta adat ring Mentawai. Kanampekannyané sareng alam puniki madué dampak ring para kramané, rumasuk ring seni tari sané wénten irika. Nika mawinang makudang genah ring Mentawai madué gerakan turuk sané masaih, krana wiadin genahnyané malianan nanging buron sané kacingakin pateh parisolahnyané. Gerakan turuk taler nyimpen nilai luhur sané mabuat ring kauripan ring Mentawai. Sakadi turuk uliat kemut sané ngambarang kapitresnan, turuk laggai uliat elang miwah bojog (bilou) ngambarang perdamaian ring suku irika.

Tata laksana

Tarian puniki ketahnyané kasolahang ring wengi tur dados piranti tamba. Turuk laggai punika dados panguntat saking sasolahan tamba sané kalaksanayang. Sikerei sané nyolahang tarian puniki madué tetujon mangda roh sané sungkan ngamolihang pabalihan miwah nénten ngalahin ragannyané krana yéning roh punika ngalahin ragannyané sang sané sungkan punika, dané pacang ngalahin. Tarian puniki taler kasarengin antuk alat musik saking kayu sané kabolongin madyannyané sané kawastanin Tuddukat miwah kasarengin taler sareng Urai. Urai punika dados seni olah vokal Mentawai sané kalaksanayang olih Sikerei ri tatkala nyolahang ring panguntat sasampun tarian punika puput. Ri tatkala Tuddukat kaplalianang punika Sikerei pacang nyinjitang cokornyané, sirahnyané marep ajeng, ragannyané kabungkukkang, miwah tangannyané ngemel don-donan sinambi ngigel.

Ring tarian puniki wénten sané kasambat napiké upakara punika kasetujuin olih leluhurnyané napi nénten. Yéning kasetujuin upakara punika dados kalanturang, nanging yéning nénten upakara puniki pacang ngrauhang bala sakadi panyungkan ngantos ngawinang kramannyané padem. Ketahnyané antuk nguningin pasaur saking leluhurpuniki, wénten tata cara khusus sané kalaksanayang olih Sikerei, sakadi nglaksanayang pamotongan buronmiwah yéning antuk pangubadan nénten dados kacingakin malianan yéning upakara puniki dados babalihan. Wénten kalih soroh Turuk Langgai, inggin punika turuk puliaijat (upakara antuk tamba) miwah turuk punen ( tarian pésta). Turuk Langgai puniki pinaka impléméntasi nampeknyané alam sareng krama Méntawai sané sajalan sareng ajahan Arat Sabulungan, inggih punika kaprecayan krama pinaka piranti maosang nilai-nilai luhur.