Pura desa lan puseh desa adat beringkit
Pura Desa lan Puseh Desa Adat Beringkit, inggih punika parhyangan sane magenah ring wawidangan desa adat Beringkit[1]. Pura puniki rumasuk pahan Pura Kahyangan Tiga sane kaempon olih desa adat[2]. Pura Desa lan Puseh Desa Adat kakepah manados tigang mandala nganutin daging Asta Kosala Kosali. Inggih punika nista mandala sane magenah ring sisi jaba. Nista mandala utawi jaba sisi puniki kawigunayang ngelaksanayang sasolahan seni ritatkala ring pura wenten karya utawi piodalan.
Ring sisi tengah kabaos madya mandala. Ring madya mandala kacihnayang antuk kawentenan palinggih Bale Agung. Palinggih puniki kawigunayang ngalinggihang Ida Bhatara Kabeh ritatkala rauh saking melasti ring segara. Ngalinggihang Ida Bhatara kabeh irika wantah mapaiketan ring aci tawur kesanga. Raris ngalantur ring jeroan utawi kabaos utama mandala.
Utama Mandala puniki wantah genah palinggih utawi gedong desa lan gedong puseh. Gedong desa pinaka lingga stana Ida Bhatara Brahma lan Gedong Puseh kalinggihang Ida Bhatara lingsir lan Ida Bhatara Wisnu. Tiosan ring Gedong desa lan puseh, naler kategepin antuk gedong petapakan lan palinggih pemaruman. Piodalan ring Pura Desa lan Puseh Desa Adat Beringkit kalaksanayang ring wrespati umanis galungan, utawi manis galungan.
- ↑ ""Nurunang": Rangkaian Penataan Pura Desa Lan Puseh Desa Adat Beringkit, Mengwi, Badung". tatkala.co (ring Inggris). 2024-06-23. Kaaksés 2025-04-13.
- ↑ "Babad Bali - Pura Kahyangan Tiga". www.babadbali.com. Kaaksés 2025-04-13.