Pasar Seni Sukawati

Pasar Seni Sukawati (pasaŕsĕnisukawati) inggih punika pasar seni sané magenah ring Désa Sukawati, Kecamatan Sukawati, Kabupatén Gianyar, Bali. Pasar puniki ngadol makudang-kudang kerajinan seni Bali minakadi sandal, manik-manik, penganggé, tas, lukisan, togog kayu miwah sané lianan. Pasar punika kaadegang sawatara warsa 1980-an tur mabukak nyabran rahina ngawit galah 06.00 ngantos 18.00 WITA.

Lelintihan

Pasar puniki kawangun antuk latar ungkur carita dagang togog saking Sukawati. Ring warsa 1983, makudang-kudang dagang sané nénten madué genah nglanturang madolan ring sawewengkon Banjar Baluan, Kota Dénpasar, nanging sering kawdongosin olih petugas ketertiban irika. Dané sareng sami raris ngaturang pinunas ring désa miwah kecamatan Sukawati mangda ngemolihang genah maadolan sané permanén. Pakraman lan Kecamatan raris nyumponin pawunan genah sauntara ring Banjar Tebuana miwah Banjar Tangluk, Désa Sukawati, Kecamatan Sukawati, Kabupatén Gianyar. Genah punika druwen Désa Pakraman Sukawati tur kawenangang kaanggé genah maadolan sauntara. Ring tengahing warsa 1983, Pameréntah Daérah Gianyar ngawitin prosés akuisisi tanah ring genah sane mangkin kaloktah dados Blok B Pasar Seni Sukawati. Genah punika, gedong pasar sané karesmiang tanggal 25 Mei 1985 olih Gubernur Bali duk punika, Dr. Ida Bagus Mantra. Ngawit saking punika dagang ngawit madolan ring pasar puniki lan pasar ngawit kauningin olih wisatawan sané rauh ring Bali. Santukan pasar niki sayan-sayan kaloktah ring para wisatawan, akéh para pengrajin saking Sukawati sané seneng maadolan irika. Nyawis indik punika, ring pangawit warsa 1990, Pameréntah Kabupatén Gianyar ngamargiang pawangunan salanturnyané ring Pasar Seni Sukawati anggen nincapang fasilitas lan kapasitas pasar ring sajeroning nampung dagang lan tamu sane sayan akéh.