Pangajian

Pangajian punika transmisi kaweruhan lan kawagedan lan panglimbakan sifat karakter. Pendidikan formal mamargi ring sajeroning kerangka kelembagaan sane terstruktur, sakadi sekolah umum, nganutin kurikulum. Pendidikan non-formal taler nganutin pendekatan sane terstruktur nanging mamargi ring jaba sistem sekolah formal, nanging pendidikan informal nyarengin paplajahan sane nenten terstruktur malarapan antuk pengalaman sarahina. Pendidikan formal miwah non-formal kakepah dados undagan, rumasuk pendidikan awal anak alit, pendidikan dasar, pendidikan menengah, miwah pendidikan tersier. Klasifikasi sane tiosan ngutamayang indik tata cara ngajahin, sakadi pendidikan sane berpusat ring guru lan sisia, lan ring mata pelajaran, sakadi pendidikan sains, pendidikan basa, lan pendidikan jasmani. Tiosan ring punika, parinama pendidikan prasida nyihnayang kahanan mental miwah kualitas angga sané madué pendidikan miwah widang akademik sané mlajahin fenomena pendidikan.

Definisi sane pastika indik pendidikan kantun kabantah, lan wenten sane nenten cumpu indik tatujon pendidikan lan kantos ring dije pendidikan mabinayan sareng indoktrinasi antuk ngalimbakang pikayunan kritis . Sane nenten cumpu punika mapanglalah indik sapunapi carane ngidentifikasi, ngukur, lan nincapang makudang-kudang wangun pendidikan. Intinyane, pendidikan sosialisasi alit-alite ring masyarakat antuk nglestariang nilai-nilai lan norma budaya, nglengkapin ipun antuk kawagedan sane kabuatang mangda dados anggota masyarakat sane produktif. Sakadi punika, prasida ngawinang panglimbak ekonomi miwah nincapang rasa eling ring pikobet lokal miwah global. Lembaga sane terorganisir madue peran sane signifikan ring pendidikan. Minakadi, pemerintah ngawentenang kebijakan pendidikan anggen nentuang galah kelas sekolah, kurikulum, lan persyaratan kehadiran. Organisasi internasional, sakadi UNESCO, sampun mabuat pisan ring sajeroning ngalimbakang pendidikan dasar majeng ring alit-alite sami.

Akeh faktor sane ngawinang kasuksesan pendidikan. Faktor psikologis minakadi motivasi, kawagedan, miwah kepribadian . Faktor sosial, sekadi status sosial ekonomi, etnis, miwah gender, sering mapaiketan sareng diskriminasi . Parindikan sane tiosan minakadi akses ring teknologi pendidikan, kualitas guru, miwah nyarengin rerama.

Widang akademik utama sane nureksain pendidikan kaloktah pinaka studi pendidikan. Punika nelebin indik sifat pendidikan, tetujon, dampak, lan tata cara anggen nincapang. Studi pendidikan madaging makudang-kudang subbidang, minakadi filsafat, psikologi, sosiologi, miwah ekonomi pendidikan . Tiosan ring punika, taler nyelehin topik-topik sakadi pendidikan komparatif, pedagogi, miwah sejarah pendidikan.

Ring prasejarah, pendidikan utamanyane mamargi informal majalaran antuk bebawosan lisan miwah imitasi . Antuk medalnyane peradaban kuno, penemuan sesuratan ngawinang panglimbak kawruhan, ngawinang transisi saking pendidikan informal nuju pendidikan formal. Awalnyane, pendidikan formal akehan prasida kaakses olih elit miwah kelompok agama. Medalnyane mesin cetak ring abad ka-15 prasida ngawentenang akses sane jimbar ring buku, mawinan prasida nincapang literasi umum. Ring abad ka-18 lan ka-19, pendidikan publik ngamolihang signifikansi, ngabuka pamargi majeng ring gerakan global mangda ngicenin pendidikan dasar majeng ring makasami, gratis, lan wajib ngantos yusa sane sampun katentuang. Sane mangkin, langkungan saking 90% alit-alit sane mayusa sekolah dasar ring sajebag jagat masekolah ring sekolah dasar.