Pancoran Pengelukatan Sapta Gangga
 Pancoran Pengelukatan Sapta Gangga | |
|---|---|
 | |
 | |
| Inpormasi umum | |
| Tipe | Pura |
| Pakem Undagi | Bali |
| Genah | Désa Pertima, Kecamatan Karangasem, Kabupatén Karangasem, Bali |
Pancoran Pengelukatan Sapta Gangga inggih punika silih tunggil genah malukat sane wenten ring Desa Adat Timbrah, Kabupaten Karangasem, Bali. Genah malukat puniki magenah ring tengahing carik ring Desa Timbrah punika mawinan genah puniki kalintang asri tur sida ngawinang manah iragane ning sadurung malukat. Margi sane patut kalintangin saking jalan raya nuju genahe puniki marupa margi beton sawatara 700 meter sane taler sampun becik. Genah malukat puniki kasengguh punaka genah anggen nglebur ala wiadin ipian ala turmaning sida ngicalang sakancan panyungkan.
Pancoran Sapta Gangga puniki madue papitu pancoran sane mawit saking klebutan sane wenten ring genahe punika. Wastan soang-soang pancoran puniki mesib tekening wastan tukad sane wenten ring India. Makadi Sungai Gangga, Sindu, Saraswati, Yamuna, Godawari, Narmada, miwah Serayu.
Manut Desa Adat Timbrah, wewidangane puniki katata duk warsa 2019. Pancoran Sapta Gangga puniki kalimbakang dados genah malukat umum turmaning kadadosang genah wisata religius anggen maripurnayang genah wisata trekking miwah cycling sane sampun dumunan kalimbakang tur kaupapira olih Desa Wisata Timbrah.
Pinaka silih tunggil desa tua ring Kabupaten Karangasem, Desa Adat Timbrah madue budaya unik sane mawasta Usaba Guling taler madue daya tarik alam sane asri.
Wit toya puniki sampun saking ilu kaprecaya pinaka genah malukat kramane irika nglukat angga ri sajeroning leteh, sekala miwah niskala. Pura Tirta Empul ring Desa Timbrah pinaka wit toya pancoran kaprecayain pinaka genah Dewa Wisnu pinaka Dewaning Toya.
Krama Desa Adat Timbrah turmaning wisatawan sane ka genahe puniki nglaksanayang malukat nenten kakenain tiket ngranjing, wantah dana punia tur makta Banten Pejati utawi Canang Sari sane jagi kaaturang ring Palinggih Pura lan ring Kolam Pancoran. Pinaka genah suci pastika wenten tata-titi sane patut kaanutin, sakadi nenten ngranjing ring wewidangan pura tur genah malukat yening cuntaka, punika taler nenten dados malukat tan pabusana, tur nenten ngawag ngutang luu.
