Palinggih Kamulan

Palinggih Kamulan inggih punika sinalih tunggil wangunan suci sane katah kawentenane ring soang-soang marajan krama Hindu ring Bali. Palinggih kamulan yening katilik saking artosnyane mawiwit antuk kruna linggih suksmane genah, samaliha kruna kamulan maduwe kruna lingga "mula" sane maartos wit utawi asal salanturnyane kawewehin antuk pangater [ka-] miwah pangiring [-an], dadosnyane Palinggih Kamulan inggih punika genah sarwa mulaning dadi, inggih punika nenten tios wantah Ida Sang Hyang Widhi Wasa.

Sastra

Palinggih kamulan kasengguh ring makudang-kudang lontar indik katattwan agama Hindune inggih punika sane kapupulang oleh Tonjaya:

1. Lontar Lebur Gangsa: lontare puniki maosang indik palekadan manusane sane sampun makta penyakit utawi gering. Santukan punika manusane mangda mautsaha ngawangun palinggih kamulan sane maduwe rong tiga mangdane sida nunas pasuecan Ida Sang Hyang Widhi antuk kadirgayusan.
2. Angesti Purana: puranane puniki maosang wantah Tri Murti (Brahma, Wisnu, miwah Siwa) pinaka pratiwimba Ida Sang Hyang Widhi Wasa sane maraga Siwa Buddha utawi Siwa Pradhana. Riantukan punika Ida kalinggihang ring Sanggar Kamulan.
3. Lontar Gong Wesi: lontare puniki maosang Ida Sang Hyang Trayodasa Saksi inggih punika Bhatari Durga Uma Dewi sane malinggih ring sanggar kamulan. Ring rong tengen kawastanin Sang Pramatma, ring rong tengah Ida kawastanin Susunatma, taler ring rong kiwa kawastanin Sang Siwatma.
4. Lontar Dewa Tattwa: lontar puniki maosang indik padagingan sanggar kamulan, inggih punika ring tengawan maaksara "UNG", ring tengah maaksara "MANG", miwah ring rong kiwa maaksara "ANG".