Tika Pagraky

Tika Pagraky inggih punika silih tunggil pagending sané wénten ring Bali. Tika Pagraky madué wastan lengkap inggih punika Ni Wayan Ika Mulaning Pagraky. Dané embas ring Karangasem, 15 Mei 1996. Tiosan kasub ring wewidangan Bali, Tika Pagraky taler kasub ring industri musik tanah air.

Pendidikan

Tika Pagraky ngranjing sekolah dasar ring SDN 1 Pidpid Karangasem. Lantas, dané nglanturang ring SMPN 1 Abang Karangasem tur nglanturang ring SMK Widya Wisata Graha Amlapura. Dané ngrereh gelar sarjana ring kampus kapal pesiar miwah perhotelan ring Monarch Bali Candidasa, Karangasem.

Karir

Sadurung kasub ring dunia musik Bali, Tika Pagraky naenin ngranjing ring Repulik Cinta Manajemen (RCM) druwén Ahmad Dhani. Drika, Tika Pagraky dados anggota Déwi-Déwi sané ngaryanang wastannyané kasub ring dunia musik Indonésia. Mangkin, Tika Pagraky dados pagending solo ring Bali. Tiosan punika, dané taler dados timpal duét sareng musisi lianan, sakadi Jun Bintang miwah Wira Krisna. Wira Krisna wantah somah Tika Pagraky sané pateh ngranjing ring dunia musik Bali.

Tembang

Tika Pagraky nyobyahang tembang solo sané kakaryanin padidi miwah kawantu olih Wira Krisna. Tika Pagraky nyobyahang tembang atiban siki. Tembang-tembang sané kasobyahang kasub ring wewidangan krama Bali. Ring warsa 2016, dané nyobyahang tembang sané mamurda "Karma". Ring warsa 2017, dané nyobyahang tembang sané mamurda "Ba Ngelah Pengganti". Ring warsa 2018, dané nyobyahang tembang sané katulis sareng Wira Krisna mamurda "Sedih". Ring warsa 2019, dané nyobyahang tembang sané mamurda "Permata Hati" miwah "Sakit Hati". Ring warsa 2020, dané nyobyahang tembang sané mamurda "Idaman".