Kuningan (logam)
Kuningan inggih punika logam paduan saking temaga lan séng, ring proporsi sané prasida kavariasiang mangda ngamolihang warna sané mabinayan lan sifat mékanis, éléktrisitas, akustik lan kimia,[1] sakémanten temaga ketahné madué lakaran sané langkungan, ketahné 2⁄3 temaga lan 1⁄3 séng. Sampun kaanggén daweg masa pralelintihan, ipun pinaka paduan substitusi: atom-atom saking kalih datu prasida saling ngentosin ring struktur kristal sané pateh.
Kuningan mirib sekadi prunggu, paduan temaga sané madaging timah nénten séng.[2] Prunggu miwah kuningan minab madaging proporsi alit saking makudang-kudang datu tiosan rumasuk arsenik, timah, phosfor, aluminium, mangan miwah silikon. Sekadi lelintihan, pabinayan pantaraning kalih paduan sampun kirang konsistén lan tatas,[3] miwah sayan akéh museum nganggén parinama sané ketah "paduan temaga".[4]
Kuningan sampun sué dados lakaran sané kasub antuk kacingak nyalang sakadi mas lan kantun kaanggén antuk gagang laci lan gagang pintu. Puniki taler sampun akéh kaanggén lakaran makarya patung lan piranti santukan titik leburné éndép, becik kakaryanin (becik antuk piranti tangan lan antuk mesin bubut lan penggilingan modérn), kuat, lan konduktivitas listrik lan termal. Kuningan sane madaging temaga sané tegehan punika alus lan warnané langkung mas; tungkalikané sane kirang temaga lan mawinan punika akéh seng ngeranayang langkung katos tur luwih pérak warnané.
Kuningan kantun lumrah kaanggen ring aplikasi ring dija tahan korosi lan gesekan sane akidik kabuatang, sakadi sereg, engsel, gir, bantalan, selongsong amunisi, resleting, selang kopling, katup, pengatur SCUBA, lan colokan lan stop kontak listrik. Punika kaanggén akéh antuk piranti musik sakadi trompét lan lonceng. Komposisi kuningan ngawinang dados pangentos temaga sané becik ring pahiasan kostum lan pahiasan mode, santukan nyihnayang tahan pisan sareng korosi. Kuningan nénten keras sakadi perunggu lan dadosné nénten becik antuk akéhan sanjata lan piranti. Taler nénten cocok kaanggen ring segara, santukan séng punika maréaksi sareng mineral ring toya pakeh, ninggalin tembaga sané mapori ring ungkur; kuningan segara, sané kawewehin antuk timah, ngelidin indike puniki, sakadi perunggu.
Kuningan sering kaanggen ring kahanan sane mabuat pisan mangda nénten keni kletikan, sakadi ring pajangkepan lan piranti sané kaanggén nampek ring lakaran sané aluh puwun utawi macedar.[5]
- ↑ Engineering Designer 30(3): 6–9, May–July 2004
- ↑ Machinery Handbook, New York, Industrial Press, Edition 24, p. 501
- ↑ Bearings and bearing metals. The Industrial Press. 1921. p. 29.
- ↑ "copper alloy (Scope note)". British Museum.
Paistilah paduan temaga patut karereh antuk mawali sane jangkep ring indik sané kakaryanin saking prunggu utawi kuningan. Puniki santukan prunggu lan kuningan ring galahé sampun lintang kaanggén silih tunggil ring dokuméntasi sané sampun sué, lan paduan temaga inggih punika paistilah jimbar saking makakalihné. Tiosan ring punika, krama prasida nganggit ring koléksi-koléksi katentu antuk wastané sané kaloktah, sakadi 'Prunggu Bénin' sané akéhan sujatiné kakaryanin saking kuningan.
- ↑ "Hand Tools – Non-sparking tools". Canadian Center for Occupational Health and Safety. 2017-12-01. Kaaksés 2022-04-30.