Gaguritan Stri Sasana inggih punika karya sastra tradisional Bali sané marupa tembang tur kaiket antuk syair sané kawastanin pupuh. Gaguritan puniki wantah asiki nganggén pupuh inggih punika Pupuh Durma. Gaguritan stri sasana kaambil saking paplajahan Stri Sasana sané kawedar olih Bhagawan Kamandaka ring para sisyané. Ring pangawit, gaguritan puniki maosang indik ala ayuning déwasa pawiwahan sané patut katiténin ring alaki rabi inggih punika sané jagi ngamargiang grhasta asrama. Tiosan punika, gaguritan puniki maosang indik kawéntenan solah anak istri, pakaryan anak istri ring sesampuné marabian[1]. Gaguritan puniki utamanyané sane marupa lontar wénten ring makudang-kudang genah, minakadi ring perpustakaan Universitas Léiden, Dinas Kebudayaan Provinsi Bali, lan Gedong Kirtya. Bantang carita gaguritan punika nelatarang indik sasanan anak istri. Babaosan anak istri sané kangkang punika indik sané kabligbagan tur katlatarang ring gaguritan puniki[2].
Gaguritan puniki madaging sasana anak istri pinaka rabi, anak luh miwah pinaka ibu utawi biang. Ring pangawit gaguritan puniki kabaosang taler indik ala ayuning dewasa rikala ngmargiang pawiwahan. Katlatarang indik ala miwah ayu rikalaning ngmargiang pawiwahan manut sasih[3]. Gaguritan puniki taler maosang, asapunapi sapatutnyane dados anak istri mangda prasida dados istri sane utama.
