Gaguritan Linggapta inggih punika silih sinunggil sastra Bali purwa sané katembangang antuk pupuh. Gaguritan puniki utamanyané sané marupa lontar, wenten ring makudang-kudang genah, makadi Unit Lontar Universitas Udayana, Dinas Kebudayaan Provinsi Bali[1], Museum Lontar Gedong Krtya, lan Perpustakaan Universitas Leiden. Untengnyané, gaguritan puniki nyaritayang indik I Linggapta sané padem santukan kapisunayang olih Ni Ketut Layang[2]. Gaguritan puniki ngicénin piteket indik pisuna miwah parilaksana sané nenten becik sakadi Ni Ketut Layang pacang ngawinang sengsara. Mawinan punika, iraga sapatutné malaksana sané becik, setata pageh ngarepin pikobet, tur pageh antuk dharma sané pamuputné jagi molihang pikenoh sané becik lan bagia. Gaguritan Linggapta puniki nganggén wantah pupuh Ginada kémanten lan mapupul saking 158 pada.
