Gaguritan Arjawicitra inggih punika karya sastra bali purwa sane katembangang antuk pupuh. Gaguritan puniki marupa lontar sane wenten ring makudang-kudang genah, minakadi ring perpustakaan Universitas Leiden. Gaguritan puniki akehnyane 146 lembar. sane kasurat nimbal antuk lantang lontarnyane 20 cm taler madue lebar 3,5 cm. Cerita puniki kakawi olih Anak Agung Anglungrah Karangasem sane pinaka silih tunggil Raja Karangasem-Lombok sane seneng ring kasusastraan. Gaguritan Arjawicitra inggih punika silih tunggil gaguritan sane nyritayang indik Raden Panji (Arja Wicitra) ngrereh rabin Ida sane mapesengan Dyah Anargawati. Tan kacerita Arja Wicitra nyingakin lukisan rabin Ida ring Asrama druen Maharesi. Sujatinnyane ring galahe punika, Dyah Anargawati wenten ring asrama punika, sakemaon kantun manados anak lanang sane mapesengan Ida Bagus Mayangkara. Arja Wicitra mautsaha pisan pacang ngrereh rabin Ida. Akeh pisan pikobet-pikobet sane nibinen Ida ritatkala ngrereh rabin Ida. Pamuputnyane, Ida Bagus Mayangkara prasida manados anak istri sane mapesengan Dyah Anargawati, nglantur makakalih nglaksanayang pawiwahan. [1]
