Domya

Domya
धौम्य
Tokoh Mahabharata
Wastan	Domya
Ejaan Déwanagari	धौम्य
Ejaan IAST	Dhaumya
Gelar	resi
Kitab pustaka	Adiparwa (Mahabharata)
Saking	Utkocaka
Genah	Indraprastha
Kasta	brahmana
Pakaryan	guru, penasihat
Klan	Anggira
Nyama	Dewala

Domya (Déwanagari: धौम्य; ,IAST: Dhaumya, धौम्य) inggih punika siling tunggil wastan resi ring wiracarita Hindu, Mahabharata. Dane arine Dewala, sentanan brahmana saking kulawarga Anggira.^[1] Dane meneng ring patapan sane mawasta Utkocaka. Ring carita Mahabharata, Domya dados guru tur penasihat spiritual para Pandawa. Dane taler sane dados pamucuk upacara pawiwahan Drupadi saking Panchala.^[2]

Guru para Pandawa

Ring Mahabharata pahan Adiparwa kacaritayang indik Panca Pandawa sane nylametang raga uli kebakaran Laksagreha. Panca Pandawa kacunduk sareng gandarwa corah madan Citrarata. Gandarwane punika prasida kakasorang Arjuna. Sasampune kasor, Citrarata kasih sareng para Pandawa. Selanturnyane, Citrarata miwah Pandawa mligbagang indik swagina pandita majeng ring soroh ksatria ri kala ngrereh kajayan. Citrarata raris ngaturin mangda Panca Pandawa ngrereh Domya ring patapan dane sane nampek saking Tukad Gangga. Panca Pandawa raris nglaksanayang sakadi aturne Citrarata. Sareng sami tangkil ring Domya raris nunas mangda dane kayun dados guru Panca Pandawa. Domya kayun tur nagingin pinunas para Pandawa. Dane raris nadosang Panca Pandawa pinaka Yajamana utawi "murid spiritual".^[2]

Ring Sabhaparwa, Domya pinaka silih tunggil resi sane mucukin upacara Rajasuya sane kalaksanayang olih Yudistira pinaka raja Indraprastha. Sasampune para Pandawa kalah majudi nglawan para Korawa, samian raris matilar ka alase. Irika, Domya ngicenin pitutur katur ring Yudistira indik bhakti lan puja majeng ring Dewa Surya, tur 108 wastan dewa sane lianan.^[3]