Danu Habéma
Danu Habéma inggih punika silih tunggil danu sané wénten ring Indonésia. Danu Habéma magenah ring cokor Gunung Trikora, Kabupatén Jayawijaya, Papua. Danu puniki wantah silih tunggil danu sané paling tegeh ring Indonésia tur kawastanin danu duur langit.
Lelintihan Danu[uah | uah wit]
Wastan asli Danu Habéma inggih punika Yuginopa. Wastan Habéma kajemak saking wastan perwira Belanda sané mawasta Létnan Habéma sané nyarengin ngawal tim ékspédisi ka Puncak Trikora ring warsa 1909. Jimbar danu puniki inggih punika kirang langkung 224,35 hektar tur magenah ring wewidangan Taman Nasional Lorentz Papua. Driki, prasida kacingak Puncak Wilhelmina utawi Puncak Trikora. Ring Puncak Trikora wénten salju khatulistiwa.[1]
Wewidangan Danu[uah | uah wit]
Alas ring wewidangan danu wantah kawasan lindung sané paling ageng ring Asia Tenggara. Suaka alam puniki jimbarnyané 24.864 kilometer persegi tur magenah ring persimpangan kalih lémpéngan benua sané bertabrakan. Driki makéh soroh beburon sané langka. Soroh buron sané sampun kauningin inggih punika 630 soroh paksi miwah 123 soroh mamalia. Makéh soroh anyar sané kacuncuk drika sakadi Kangguru Pohon. Buron puniki mabinayan sareng kangguru lianan. Kangguru Pohon mawarna item lan putih, awaknyané ageng, tur kacuncuk ring wewidangan perbukitan. Soroh buron sané dados cihna driki inggih punika 2 soroh Kasuari, 4 Megapoda, 31 soroh Merpati, 30 soroh Kakatua, 13 soroh paksi Udang, 29 soroh paksi Madu, miwah 20 soroh endemik sakadi Cendrawasih ikuh lantang miwah Puyuh Salju.
Wewidangan Danu Habéma wantah umah saking Suku Nduga, Suku Dani, Suku Amungme, Suku Sempan, miwah Suku Asmat. Kebudayaan saking suku-suku punika makéh tur ngulangunin. Sakadi, Suku Asmat sané kaloktah antuk keterampilan pahat patung. Suku punika taler identik sareng alas miwah taru. Krama suku punika mapikeneh taru dados cihna angga manusa, dahan sakadi lima, batang sakadi angga, miwah buah sakadi sirah.
Wénten taler Féstival Lembah Baliem sané prasida kacingakin. Féstival puniki wantah acara simulasi puputan antar Suku Dani, Lani, miwah Yali. Ring Féstival puniki, prasida kacingak simulasi puputan dan sesolahan tari khas saking suku drika. Féstival puniki kalaksanayang rikala Agustus tur matepatan sareng Kemerdékaan Indonésia.[2]
Pustaka[uah | uah wit]
- ↑ "Danau Habema Papua Menariknya Danau Tertinggi di Indonesia - Papua". web.archive.org. 2020-06-20. Kaarsipin saking versi asli ring 2020-06-20. Kaaksés 2022-11-13.CS1 maint: BOT: original-url status unknown (link)
- ↑ "Intip Indahnya Danau Habema di Papua, Julukannya 'Danau di Atas Awan'". Tribunjabar.id (ring Indonesia). Kaaksés 2022-11-13.