Damayanti
| दमयंती | |
|---|---|
 Gegambaran "Damayanti lan Angsa sane bisa ngraos", pakaryan Raja Ravi Varma. | |
| Tokoh dalam mitologi Hindu | |
| Wastan | Damayanti |
| Ejaan Déwanagari | दमयंती |
| Ejaan IAST | Damayantī |
| Kitab pustaka | Mahabharata |
| Saking | Kerajaan Widarbha |
| Kasta | kesatria |
| Rabi | Nala |
Damayanti (Déwanagari: दमयंती; IAST: Damayantī) inggih punika tokoh ring mitologi Hindu. Ipun wantah putrin Sang Prabu Bhima saking kerajaan Widarbha. [1] Ipun dados rabin Sang Prabu Nala saking kerajaan Nishadha tur carita ipun sareng kalih kapanggihin ring Mahabharata. [2]
Damayanti tresna kapining Nala ri kala ipun mireng carita indik kautaman lan kaluihannyane saking angsa. Ri kala galah sane becik sampun rauh majeng ring Damayanti pacang milih rabinnyane ring sajeroning swayambara, makudang-kudang raja lan pangeran rauh jagi nunas ipun kaanggen rabi, punika taler Nala. Sang Hyang Indra, Sang Hyang Agni, Sang Hyang Baruna, miwah Sang Hyang Yama taler rauh. Nala matemu sareng para dewatane irika, raris ida bhatara ngandikain Nala ngatur uningang ring Damayanti mangda milih sinalih tunggil dewata dados rabi. Damayanti kantun ngajinin para dewatane, sakewanten ipun nenten kayun milih sinalih tunggil para dewatane dados rabi. Ipun pageh milih Nala dados rabine, yadiastun ipun salanturne rusak sangkaning judi.
Para dewatane raris nyutirupa dados Nala. Mangda prasida manggihin Nala sane sujati, Damayanti nitenin ipun saka siki. Pamuputne Damayanti prasida ngamolihang Nala sane sujati tur marabian sareng ipun. Sedek dina anu, detya Kali, sane marasa kasepan nyarengin swayambara digelis lunga nangkil ring para dewata. Para dewata nguningayang indik Damayanti sampun milih Nala dados rabinnyane tur taler nlatarang sapunapi Damayanti sampun prasida nglintangin ujian sane kaicen olih para dewatane. Sasampune miragiang satua para dewatane, raris detya Kali bendu. Ipun masumpah pacang ngaenang Nala doh saking pamargin dharma (kapatutan). Ipun ngantosang roras tiban mangda prasida ngwales.
Damayanti lan Nala idup bagia tur madue oka kalih diri. Ri kala Nala nenten ngumbah cokor wusan sembahyang, Kali ngawesa pikayunannyane. Wusan kawesa olih Kali, Nala majudi sareng semetonne sane mawasta Puskara. Ring judi punika, Nala kalah mawinan patut nyerahang artha brana tur kerajaanne majeng ring Puskara. Nala lan Damayanti taler meneng ring alase duk sang kalih kapasahang. Selanturnyane, Nala lan Damayanti mapasahan. Sangkaning katiben bancana, Nala mauwah dados anak bentir sane mawasta Bahuka tur makarya dados srati Raja Rituparna ring kerajaan Kosala, tur Damayanti makarya dados parekan ring kerajaan Chedi.
Sasampune mamarekan ring kerajaan Chedi, Damayanti kawaliang ka kerajaan ajine, irika ipun prasida masikian sareng okan-okannyane. Ipun raris ngrereh Nala, sakewanten nenten prasida kapanggih. Raris Damayanti matemu sareng anak bentir tur ngayunin minab ipun dados kurenan idane. Mangda prasida nguji jati dirinyane, Damayanti ngamargiang swayambara sane kaping kalih. Nala silih tunggil saking panyatusan raja sane ngrauhin swayambara, tur Nala ngiringang rajannyane. Ring margi nuju swayambara, sang prabu ngajahin Nala makudang-kudang teknik majudi. Damayanti uning yening anak bentir punika wantah Nala santukan ipun ngeh antuk ambun ajengan sane sampun kasiagayang olih Damayanti antuk ipun. Ipun sareng kalih masikian malih, tur Nala mauwah malih kadi jati mula. Nala nganggen kaweruhannyane indik majudi mangda prasida ngambil malih sakancan sane sampun kaambil saking ipun. [3] [4]
- ↑ Roshen Dalal (2010). Hinduism: An Alphabetical Guide. Penguin Books. pp. 109, 191, 282, 316. ISBN 978-0-14-341421-6.
- ↑ J. A. B. van Buitenen (1981). The Mahabharata, Volume 2. University of Chicago Press. pp. 318–322. ISBN 978-0-226-84664-4.
- ↑ Roshen Dalal (2010). Hinduism: An Alphabetical Guide. Penguin Books. pp. 109, 191, 282, 316. ISBN 978-0-14-341421-6.
- ↑ C.Kunhan Raja. Survey of Sanskrit Literature. Bharatiya Vidya Bhavan. pp. 136, 146–148.
| Umum | |
|---|---|
| Perpustakaan nasional | |
