Benzaiten

Benzaiten (Aksara kanji: 弁才天, 弁財天), taler kawastanin Benten, inggih punika silih sinunggil dewi utawi batari ring agama Jepang. Benzaiten puniki sujatine perwujudan saking Ida Batari Saraswati ring agama Hindu sane sane kabakta ka Jepang ritatkala panglimbak agama Buddha.

Benzaiten lan Naga

Puja Benzaiten sampun wenten ring Jepang ring abad ka-6 kantos ka-8, utamanyane malarapan antuk terjemahan Sutra Cahaya Emas saking basa Cina, sane nyambatang dane. Ida taler kabaosang ring Sutra Teratai lan akeh kagambarang makta biwa (kecapi Jepang), mabinayan sareng Saraswati ring India sane makta veena, tur Saraswati ring Bali sane makta rebab. Ida inggih punika entitas sinkretisme ring ajaran Buddha miwah ajaran Shinto Jepang.

Etimologi

Krana Ida kapatehang sareng Ida Batari Saraswati ring agama Hindu, Ida inggih punika nguwasanin toya, basa, musik, kaweruhan. Kanji sane wenten ring waran dane medaging telu:

1. 弁 (ben), maduwe artos wicara utawi pabligbagan,
2. 才 (zai), maduwe artos kaweruhan,
3. 天 (ten), maduwe artos dewi utawi batari.

Saraswati ring Agama Hindu (India)

Ring Cina, kawaca Biancaitian, nanging ring Jepang kawaca Benzaiten. Wastannyane nyihnayang perannyane dados dewi sane nguwasanin kawikanan utawi kaweruhan. Santukan Sutra Cahaya Emas majanji pacang nyayubin, ring Jepang Ida dados dewi penjaga negara lan salanturnyane kramanyane. Di kenkenne Ida kasengguh Benten (弁天), yadiastun wasta puniki lumrahnyane nujuang dewa Brahma.

Benzaiten ring Agama Buddha Jepang

Arca Benzaiten

Ring Regweda (6.61.7) Ida Batari Saraswati kasuciang krana mademang Wretra sane maulu telu, taler kauningin pinaka Ahi (ula). Minab puniki silih sinunggil sumber paiketan Saraswati / Benzaiten sareng ula lan naga ring Jepang. Ida kasuciang ring makudang-kudang genah ring sajebag Jepang; minakadi, Pulau Enoshima ring Teluk Sagami, Pulau Chikubu ring Danu Biwa miwah Pulau Itsukushima ring Segara Pedalaman Seto (Telu Kuil Agung Benzaiten). Ida lan naga maulu lima inggih punika tokoh utama ring Enoshima Engi, babad kuil-kuil Enoshima sane katulis olih biksu Jepang Kōkei (皇慶) ring warsa 1047 M. Manut Kōkei, Benzaiten inggih punika putri kaping tiga saking Raja Naga Munetsuchi (無熱池) sane maartos "danu nénten panes" (basa Sansekerta: Anawatapta, danu sané magenah ring tengahing jagat ring kosmologi Buddha kuno).

Benzaiten sakadi Kami (Shinto)

Benzaiten inggih punika kami (konsep dewa-dewi ring agama Shinto Jepang) istri ring agama Shinto antuk wasta Ichikishima-hime-no-mikoto. Paviliun kuil Shinto polih kabaos benten-do utawi benten-sha, lan wantah makasami kuil-kuil Shinto polih kadadosang kuil Benzaiten, umpamine ring Kuil Zeniarai Benzaiten Ugafuku (Kamakura) utawi Kuil Kawahara (Nagoya).